Кытайлык эже-сиңди Кыргызстанга салам жеткиргени атчан келе жатышат
Кытайлык кыргыз кыздар Риза жана Гүлсанат Ала-Тоого атчан келе жатышат. Эже-сиңдилер Кытайдын Кызыл-Суу автономдуу облусунун тургундары болот. Алар сапарын 3-майда баштап, мурунку Улуу Жибек жолу менен ат арытууда.
Кыздар социалдык тармактагы баракчасы аркылуу баскан жолун, сапардагы кыйынчылыктарын, кызыктуу окуяларын видеого тартып, көргөзүшүүдө. Ала-Тоого атчан келе жаткан эже-сиңдилерди Кытайдагы кыргыз айылдарынын жашоочулары салтанаттуу тосуп алышып, коноктоп, андан соң жол көргөзүп узатып жатышат.
"Максатыбыз - Кытайдагы кыргыздардын саламын Ала-Тоого жеткирүү, элдердин достугун даңазалоо, ата-бабаларыбыздын баскан жолунан өтүү, кыргыздардын ат жалында ойной ала турганын көргөзүү", - дейт алар.
"Жергиликтүү бийлик кыздарды чек арадан, андан кийин Ат-Башынын Кара-Суу айылынан, Нарын шаарынан, Долон ашуусу тараптан, Кочкор районунан тосуп алып, Ысык-Көлгө узатууну пландап, даярданып жатат. Бирок кыздар менен түз байланышыбыз жок болууда", - дейт өкүлчүлүктөн.
Эже-сиңдилер "Торугарт" бекетине жакындап калышканын социалдык тармактагы баракчасы аркылуу билдиришти.
