Ошто түнкү клубда эс алуучулар мушташып, милиция комага түштү
Ош шаарындагы Sky Bar түнкү клубунда мушташ чыгып, милиция кызматкери комага түштү. Маалыматты редакцияга шаардык ички иштер бөлүмүнөн ырасташты.
Тергөөнүн алгачкы маалыматтарына караганда, 9-сентябрга караган түнү саат 02:00 чамаларында түнкү клубда эс алып отурган жарандар өз ара сөз талашып урушуп, мушташа кетишкен.
"Натыйжада Ош ОИИБдин 1996-жылы туулган кызматкери К.М. оор абалда Ош шаардык ооруканасына түшүп, комада жатат. Жабырлануучунун дагы 2 кесиптеши күбө катары чакырылууда", - дешет башкармалыктан.
Бул факты катталып, тергөөгө чейинки иштер башталган. Окуя боюнча бардык күбөлөр суралып, жатат. Соттук-медициналык экспертизалар дайындалган.
Кылмышка шектүү катары Кара-Суу районунун тургундары: 2003-жылы туулган А.А., 2001-жылы туулган К.А., 2001-жылы туулган К.Э. жана 2002-жылы туулган Т.У. кармалып, убактылуу кармоочу жайга киргизилди.
Алардын үстүнөн 130-беренесинин 2-3-бөлүктөрү менен кылмыш иши козголуп, тергөө иштери жүрүп жатат. Ош шаардык соту тарабынан шектүүлөр 12-октябрга чейин камакка алынды.
Аталган маселе боюнча ИИМдин Ички иликтөө кызматы тарабынан милиция кызматкерлеринин кыймыл-аракеттерине баа берүү үчүн кызматтык иликтөө жүргүзүлүп жатат.
