Келерки жылы окуу жайга тапшыруу үчүн ЖРТнын босого баллы 123 болот
Жалпы республикалык тестирлөөнүн жыйынтыгы боюнча ЖОЖдорго өтүү баллы акырындык менен жогорулатылат. Бул тууралуу Билим берүү жана илим министри Догдуркүл Кендирбаева 1-декабрда Жогорку Кеңештин "Ата Журт Кыргызстан", "Ишеним" фракциялары жана "Мекенчил" депутаттык тобунун жыйынында билдирди.
Анын айтымында, педагогикалык адистиктерге кабыл алууда босого балл 5%га көтөрүлөт. Мындан улам, ЖРТнын орточо баллы 2%га жогорулайт.
"Кийинки жылы биздин болжолдор боюнча бюджеттик орундар үчүн босого балл 123 баллды түзөт (учурда - 110), - дейт бөлүм башчы.
Ал кошумчалагандай, 2023-2024-окуу жылында педагогикалык адистикке тапшыргандардын орточо баллы 160 баллды түздү. Аталган адистиктер боюнча билим алып жаткан студенттер биринчи курста 1 миң сом, экинчи курста 2 миң сом, үчүнчү курста 3 миң сом, төртүнчү жылы 4 миң сом, бешинчи курста 5 миң сом стипендия алышат.
